VAKARUKU NI IVI

FIJIAN VERSION: VAKARUKU NI IVI

E dau cavu ki na vale e sega soti ni caka vinaka ena kena delavuvu, ka dau turu ena gauna ni tau ni uca.

ENGLISH VERSION: LIKE BEING UNDER THE IVI TREE (TAHITIAN CHEST-NUT)

Said of a house, the roof of which is badly constructed and leaks. The ivi tree has large leaves and looks like a good tree to provide shelter from the rain, but the rain drips through very quickly.

VOSAVOSA VAKA-VITI

Oqo e so na i Vosavosa Vaka-Viti e kumuni rawa mai ka nuitaka ni ko ni na marautaka na vakawilika ka veiwasei taka yani me ra kila na luveda kei ira na i tabagone. Vinaka vakalevu.

Maca na wai ka koto na qere
Ni sa oti na soqo se marau, sa qai yaco na leqa ni sa oti na ka e da dau maroroya tu. E dau i vakarau tudei vei keda na i taukei na veisisivi me o cei ena levu taudua na ka e vakarautaka ena gauna ni veisolevuti. E da dau solia taucoko na noda maqosa veitalia me da qai lai leqa e muri ni sa oti na soqo se marau.

Makutu i vale tani
E so era dau makutu i vale ni tani se koro tani ka sega ni vaka kina ena nodra dui vale se koro. E so era dau vakaraitaka na nodra maqosa me vinaka vei ira na tani ia e ra dau sakuca se vucesa mai nodratou vale se koro.

E na qai vakuri tale yani...Fijituwawa Research Team

VOSAVOSA VAKA-VITI

Oqo tale na i kuri ni Vosavosa-Vakaviti. Nuitaki ni ko ni na taleitaka tiko na vakawilika na kedra i balebale.

E da mata vata ga, eda dui tobutobu se nubunubu
E da tamata vata ga ia e duidui na lomada kei na veika eda dui vinakata. E dau tau tale ga na i vosavosa oqo vei ira e da nauma ni tautauvata na i tovo ni yaloda, ia ni sa dede na tiko e da qai raica ni levu na noda duidui e na veika eda gadreva.

E da sa mai tarai Burotukula sara
E da sa mai yacova sara na vanua e da tatadrataka tu mai. O Burotukula na yanuyanu ni tadra ka dau talanoataki vei ira na tukada ni ciri volekati Matuku ka ra levu kina na marama kei na goneyalewa rairai totoka. Ni rawati e dua na ka e dau tatadrataki tu mai vakabalavu se kune e dua na ka e dau kunekune dredre, e dau vakayagataki kina na i vosavosa oqo.

Ena qai kuri tale yani....Fijituwawa.com Research Team

VOSAVOSA VAKA-VITI

Oqo e so nai Vosavosa-Vakaviti e dau kilai raraba tu vei keda na i Taukei mai Viti. E da dau kila ni dau vakayagataki vakalevu na veivosavosa oqo ena i vola ni talanoa ka dau lagati talega ena sere me vakamacalataki kina na kedrai balebale. Nuitaki ni ko ni na marautaka na kedra sa mai vakamatatataki sara to oqo e na Fijituwawa.com

Au sa ciciva oti na cere
Na i vosavosa e dau cavuti ni cakacaka taki oti e dua na ka dredre ena dua na gauna balavu. E ra dau cavuta vakawasoma o ira e ra qase cake vei keda se ko ira era sa cakava oti na veika dredre ka ra kila na kena dredre ni rawati e dua na ka. E dau tukuni vei ira e ra se qai tovoleya vakadua ka dau caka me vakayaloqaqataki ira me ra rawata tale ga.

Baca kuita
Vakayagataka na ka e taleitaka me vakagarogaroi kina e dua na tamata. E dau vakayagataki vakalevu na baca kuita vei ira na ika, baleta ni dau yavavala e loma ni wai ka sega ni toka vakamalua. E ra dau totolo sara na nodra ciqoma na ika na baca ka ra mani coko sara kina. E vaka kina o ira e ra sega ni dau yalomatua me ra dau vakarogoca nai vakasala mai vale, ka ra dau lai coko ena nodrai vakavuvuli na tani ka mani yaco vei ira e muri na leqa.

Balolo ni vakananu
Ni dua e dau nanumi koso ga ena dua na ka ni sa vo tu. Na Balolo e kakana ni yabaki ka dau lako ga mai vakadua ena loma ni yabaki. Ni sa vakayagataki oti e da dau qai mai vakananuma toka yani me yacova tale na yabaki ka tarava. E dau qai vakayagataki kina na i vosavosa oqo e na noda nanuma e dua na wekada ni sa vo tu na magiti se kakana.

E na qai vakuri tale yani ......Fijituwawa Research Team